डडेलधुरा बस दुर्घटनाः शोकमा डुब्यो शिखर

डडेलधुरा बस दुर्घटनाः शोकमा डुब्यो शिखर

८ मंसिर, डोटी । रोजगारीका लागि भारतको चेन्नई गएका डोटी शिखर नगरपालिका-११ तल्लीसातका २५ वर्षीय शंकर जोरा तिहारको पर्सिपल्ट मात्र घर फर्किएका थिए । गर्भवती श्रीमती गंगाले प्रसूति हुने समय नजिकै आएको भन्दै उनलाई फोन गरी बोलाएकी थिइन् । श्रीमती गंगा प्रसूतिको समयमा श्रीमान आफूसँगै होउन् भन्ने चाहन्थिन् ।

भारतबाट घर आएपछि शंकरले श्रीमतीलाई जचाउन उपक्षेत्रीय अस्पताल डडेल्धुरा लगे । डाक्टरले उनलाई एक हप्तापछि फेरि जचाउन आउन सल्लाह दिए । उनीहरु अस्पतालबाट फर्किए, तर घर कहिल्यै नपुग्ने गरी ।

बिहीवार डडेल्धुराको अमरगढी नगरपालिका-११ रडुवामा भएको से १ क २९३ नम्बरको स्कुल बस दुर्घटना हुँदा श्रीमान-श्रीमतीको एकै चिहान भयो । पोष्टमार्टम गर्दा डाक्टरले गंगाको पेटबाट मृत बच्चा (छोरा) निकाले । शुक्रबार शंकर र गंगासँगै शिशुलाई पनि सेती नदीमा सेलाइयो ।

खोसियो सहारा

रोजगारीका लागि भारत गएका शंकरका बुवा डम्मर जोराको गत वर्ष भारतमै निधन भएको थियो । बुवाको निधनपछि बुढी आमा र नावालक दुई भाइको पालन पोषणको सम्पूर्ण जिम्मेवारी शंकरको काँधमा थियो । उनले त्यो जिम्मेवारी त पूरा गर्न पाएनन् नै नाती-नातिनाको मुख हेरेर मर्ने आमाको सपना पनि अधुरै रह्यो ।

सोही गाउँका योगेन्द्र वोहरा पनि गर्भवती श्रीमती हरिनालाई जचाउन उपक्षेत्रीय अस्पताल गएका थिए । फर्किदा अरु गाडी नपाएपछि उनी पनि सोही बसमा चढेछन् । उनको पनि ज्यान गयो । दुर्घटनामा परी घाइते भएकी हरिनाले अस्पतालको शैयामा श्रीमानलाई कुर्दै छिन् । उनको खुट्टा भाँचिएको छ । भारतमै रोजगारी गर्ने योगेन्द्र पनि तिहार मान्न घर आएका थिए ।

योगेन्द्रका बुवा पदम बोहरा दमका रोगी छन् । भारतमै जागिर गरेर उनले भाइलाई आवासीय विद्यालयमा पढाउँदै थिए । परिवारको आर्थिक अवस्था कमजोर भएका कारण आफू पढ्न नपाएका योगेन्द्र भाइ पढेर ठूलो मान्छे होस् भन्ने चाहन्थे । तर, आफ्नो सपना पूरा गर्न नपाउँदै उनी अनन्त यात्रामा गए । श्रीमती हरिनाको हेरचाहका लागि उनका माइती पक्ष अस्पतालमा छन् ।

डडेल्धुरामा भएको उक्त दुर्घटनाले मृतकका परिवारलाई मात्रै होइन, डोटीको शिखर नगरपालिकालाई नै शोकमा डुबाएको छ । उक्त दुर्घटनामा १८ जनाको मृत्यु भएको थियो । तिमध्ये शंकर दम्पत्ति र योगेन्द्रसँगै शिखर नगरपालिकाका मात्रै ६ जनाले ज्यान गुमाए । १० जना घाइते छन् ।