नायिका नम्रता श्रेष्ठका कारण मोडिएको प्रियासनको बाटो

मानिसको जीवनमा विभिन्न आरोह अवरोह हुन्छ । कुनै कुनै व्यक्तिहरुका कारण उठ्नै नसक्ने गरेर सकिन्छ मान्छे, कुसैले गर्दा रहर लाग्दो प्रगतिपथमा पुग्छ मान्छे ! कुनै मान्छेका कारण प्रगतिपथमा लम्कन सफल उपन्यासकारको नाम हो– सविन प्रियासन । प्रियासन दाङको घोराहीमा बस्छन् । उनी यतिबेला उदयमान उपन्यासकारका रुपमास्थापित छन् । नायिका नम्रता श्रेष्ठका कारण उपन्यास लेखनमा फर्किएका प्रियासनले ६ वटा उपन्यास प्रकाशित गरिसकेका छन्, उनको एउटा कथा र एउटा लेखहरुको संग्रह पनि प्रकाशित छ ।

२०६० सालमा पहिलोपटक रोदनपछिको उपन्यास निकालेर साहित्यिक फाँटमा पाइला अगाडि बढाएका प्रियासनले त्यसपछि सपनाभित्रको सपना कथा संग्रह र भूमरी उपन्यास प्रकाशित गरे । दुईवर्षसम्म उनी साहित्यमा क्रियाशिल बने । तीनवटा पुस्तकहरु प्रकाशित गरे । त्यसपछि १० वर्षसम्म पत्रकारितामा क्रियाशिल बनेका प्रियासनले यस अवधिमा ‘साहित्यको स’ पनि लेखेनन् । तर जब २०७१ सालमा उनको भेट नायिका नम्रता श्रेष्ठसँग दाङमा भयो, त्यसपछि उनको मनमा साहित्यका रागहरु उत्पन्न भए । एकप्रकारले भन्ने हो भने उनको साहित्यमा नायिका नम्रता श्रेष्ठका कारण पुनरागमन भयो ।

चलचित्र सम्बोधनको च्यारेटी शोका लागि दाङ आएकी नम्रतासँगको क्षणिक भेटका कारण मनमा लुकेका साहित्यिक डबलीहरु क्थाका पात्र बन्न थालेपछि प्रियासनले नम्रताकै बारेमा उपन्यास लेख्ने योजना बनाए । जुन कुरा २०७१/०७२ तिर भाइरल बन्यो । नायिका श्रेष्ठको जीवनमा आधारित रहेर उपन्यास निकाल्नका लागि प्रियासनले नम्रताको बारेमा भरमज्दुर अध्ययन गरेका थिए । उनको बारेमा लेखिएका पत्रपत्रिकाहरु, यूट्यूव, नम्रताका अन्तर्वार्ताहरु देखि उनले चिनेजानेका धेरैसँग सोधेर नम्रताको बारेमा जानकारी लिएको प्रियासनको भनाइ छ । उपन्यास लेख्ने विषयमा नम्रतालाई सम्बोधन चलचित्रका निर्माताहरुमार्फत खबर पठाएको र त्यसपछि फोनबाट पनि यस विषयमा धेरैपटक नम्रतासँग छलफल गरेको बताउने प्रियासनले अध्ययनकै भरमा उपन्यासको पाण्डुलिपी तयार बनाए । पाण्डुलिपी तयार भएपछि नायीका नम्रता श्रेष्ठलाई काठमाडौंमा गएर उनको हातैमा दिएको बताउने प्रियासन भन्छन्, ‘पाण्डुलिपी पढेपछि नम्रताले अध्ययनका भरमा लेखिएकाले केही कुरा भन्ने र थपेर निकाल्नुपर्छ भन्नुभयो । तर उहाँको व्यवस्तता र मेरो पनि व्यस्तताले गर्दा आजसम्म उहाँसँग पुनः भेट्न पाएको छैन । जसले गर्दा उहाँको बारेमा उपन्यास निकाल्ने कुरा रोकिएको छ ।’

प्रियासनले नम्रताको बारेमा लेखिएको उपन्यास ननिकाले पनि त्यसपछि २०७३ जेठमा पुनरागमन उपन्यास निकालेर १० वर्षपछिको साहित्यिक रिक्ततालाई उनले मेट्ने काम गरे । त्यसपछि उनले पल्लवी, सहनशीला र केही दिन अगाडि सेल्फी उपन्यास निकालेका छन् । प्रियासनले निकालेका सबै उपन्यासहरु पठनीय भएकाले बिक्री समेत अत्यधिक भएको छ । अब लगत्तै लक्कीचार्म र ब्रेकअप डायरी यही वर्षमा निकाल्ने तयारी प्रियासनको छ । २०७६ सालमा नम्रताको बारेमा लेखिएको उपन्यास निकाल्ने योजना बनाएका प्रियासन नम्रताको चाहना अनुसार बायोग्राफी वा उपन्यासकारुपमा जेजसरी हुन्छ प्रकाशन गर्ने सोँचमा छन् । नम्रताका कारण उपन्यास लेखनमा फर्किएका प्रियासनले पछिल्लो समयमा गीतहरु पनि लेखिरहेका छन् । प्रियासन नेपाल पत्रकार महासंघ दाङको अध्यक्षमा रहेर पत्रकारिताको नेतृत्व पनि गरिरहेका छन् ।