ओलीविरुद्ध नेपालको धावा : किलो न पावा !

काठमाडौं, १४ असोज । पार्टी एकीकरणपूर्व नै नेपाल कम्युनिस्ट पार्टीका अध्यक्ष मध्येका एकजना पुष्पकमल दाहाल प्रचण्डले नेता माधव नेपाललाई दुईटा लोभ फ्याँकेका थिए– प्रधानमन्त्री बनाउने वा भावी अध्यक्षमा निर्वाचित गराउने ।

दुई पार्टीको एकीकरण भएपछि अध्यक्षद्वय केपी शर्मा ओली (प्रधानमन्त्री) र प्रचण्ड तल्ला तहसम्मको एकीकरणमा अभ्यस्त हुँदाहुँदै विदेश जानुपर्ने भयो । ओली राष्ट्र संघको महासभामा भाग लिनका लागि अमेरिकाको न्युयोर्क र प्रचण्ड पत्नी सीताको उपचारका लागि सिंगापुर पुगे । यसै पनि सत्तारुढ दलको नेतृृत्व पाएका नेपालले भने संसदमा नेकपाकै हुर्मत लिनेगरी सम्बोधन गरे– आफ्नै सरकारको आलोचनासहित ।

त्यतिमात्र गरेनन् । नेपालले स्थायी कमिटीको बैठक डाकेर अध्यक्षद्वय ओली र प्रचण्डको कार्यशैली खराब भएको, प्रदेश इञ्चार्ज, अध्यक्ष, सहइञ्चार्ज र सचिव तोकेका विषयमा पनि असन्तुष्टि पोखेका थिए ।

उनको आलोचनामा खर्च गरेका शव्दलाई काउन्टर जवाफ दिँदै ओलीले त्यसलाई कुण्ठा भनिदिए । बास्तवमै नेता नेपालले नेतृत्वको जिम्मेवारी पाएका बेला गरेको हर्कत कुण्ठा पोख्ने काम नै रहेको नेकपाका नेताहरू बताउँछन् ।

‘यहाँ निर्णय गर्दा उहाँलाई नसोधी गरिएको होइन, तयार भएको खाकामा अन्तिम रूप दिइएको थियो’, एक नेताले भने,‘फेरि अध्यक्षहरू नभएको मौकामा गुटगत भेला गरेर माधव जीले के गर्न खोजेको ?’

प्रचण्डले एकीकरणपूर्व फ्याँकेको लोभअनुसार नै आफुले भाग नपाएपछि नेपालले गुटगत भेला गर्नु र संसदमा सरकारकै आलोचना गर्नु दुखद भएको नेकपाका नेताहरू बताउँछन् ।

१५ बर्षसम्म निरन्तर तत्कालिन एमालेको नेतृत्व सम्हालेका नेपालका पालामा नै पार्टीको साइज घटेको थियो । पहिलो संविधानसभामा असफल नेतृत्व भएका कारण तत्कालिन एमाले तेस्रो भएको थियो । उनी पराजित भए पनि प्रधानमन्त्री बन्ने लोभमा संसदमा मात्र आएनन्, प्रधानमन्त्री समेत भए ।

‘पार्टीले उहाँलाई मौका दिएको हो । सबैभन्दा लामो कार्यकाल पार्टी नेतृत्व र त्यसपछि प्रधानमन्त्रीको कार्यकाल पनि उहाँले चलाउनुभयो । अब के चाहियो ?’, एक नेता प्रश्न गर्छन्,‘यसबेला अभिभावक बनेर नेकपा एकीकरणपछिका सबै तह र तप्कामा उहाँको सुझाव र सल्लाह हुनुपर्ने हो, गुटगत भेलासहित नेतृत्वको आलोचना होइन ।’

ओलीको अमेरिकादेखिको जवाफले नेपालको रणनीतिक अभ्यासको ओजन तय गरेको छ । ‘उनले गरेका काम न किलोमा गनिन्छ न पावा नै हो’, नेपालइतरका एक नेता भन्छन्,‘अहिले सम्हालिएर कम्युनिस्टलाई जोगाउने बेला हो, विवादीत अभिव्यक्ति र भेला गरेर विभाजनको बिऊ रोप्ने समय होइन ।’